العلاقات – تيك ستيب | طبيب نفسي أونلاين | مساعدة مرضى النفسية والادمان وذويهم |استعد حياتك الآن
Skip to content Skip to sidebar Skip to footer

العلاقات

يعني ايه علاقة؟

علاقة مش معناها ولد و بنت بيحبوا بعض -لا- العلاقة هي أي تواصل بين اثنين، زوج و زوجة، أم و أولادها، ٢ أصحاب، المدير و الموظف و هكذا….

طيب يا تري إيه أهمية العلاقات في حياتنا؟

باختصار إحنا منقدرش نعيش لوحدنا، محتاجين ناس في حياتنا نشاركهم مشاعرنا و مشاكلنا، محتاجين ناس في حياتنا نساعدهم و يساعدونا.

إحنا عاملين زي حلقات في سلسلة واحدة، كلنا محتاجين بعض.

طيب هل كل العلاقات اللي في حياتنا علاقات صحية أو فعالة؟

للأسف الإجابة: لا

ممكن في حياتنا نتعرض للعلاقات المؤذية أو اللي بنسميها  Toxic Relationship

العلاقات المؤذية ده بتعرفها ازاي؟؟؟

العلاقة المؤذية هي العلاقة اللي مش بأحس فيها إن أنا سعيد أو مش راضي عن نفسي، العلاقة ده بتعطل تحقيق أهدافي، بأحس فيها إن مش واثق في نفسي بسبب إن الطرف الآخر بيوصلي إحساس دائم إن شكلي و شخصي “صفاتي” فيهم حاجة غلط.

العلاقة المؤذية ده ممكن يكون بيحصل فيها استغلال سواء استغلال مادي، أو استغلال المشاعر أو استغلال جنسي…. في العلاقة دي الطرف المؤذي بيفقد الطرف الآخر احترامه لنفسه.

باختصار العلاقة ده بتدمر الشخص على كذا مستوى ..

ايه الطرق اللي ممكن الطرف المؤذي يأذي بيها الطرف التاني في العلاقة؟

أول نوع و بيحصل كتير جدا حاجة اسمها التلاعب بالعقول أو Gaslighting, يا ترى عبارة عن ايه المصطلح  ايه؟

ده نوع من أنواع الإيذاء العاطفي اللي بيخلي الطرف الثاني يشك في نفسه و في الواقع اللي حواليه و في إدراكه للأمور، يشك في ذكرياته و الحقائق اللي حواليه.

فده بيخلي الطرف الثاني مش واثق في نفسه، و علطول قلقان و متلخبط .

المصطلح ده جاي من فيلم Gaslight اللي اتعمل سنة ١٩٤٤ و قبله مسرحية سنة ١٩٣٨ لما كان الزوج بيقنع مراته أنها بتهلوس و عندها مرض عقلي و في الحقيقة هو اللي كان بيتلاعب بالنور اللي طالع من مصباح الغاز و يخلي الصور و يحرك حاجات من مكانها.

طيب ايه أشكال ال Gaslighting؟

  • واحد يجيي يشكك في ذكرياتك مع انك متأكد انك فاكر و يقولك و يقنعك انك فاكر غلط أو متلخبط و يقولك انت علطول ناسي كدة و يفضل يعمل معاك كدة طول الوقت لغاية ما تصدق انك فعلا ناسي.
  • إن حد فجأة يقطع معاك كدة و يقولك أنا مش فاهم أنت بتكلم عن ايه، لغاية ما تحس بالذنب و إن أنت اللي غلطان فيه.
  • أن حد يتفه من مشاعرك و يحسسك أنك over، مالك over كدة، الموضوع مش مستاهل، أنت queen drama.
  • أنه ينكر المواقف و الأحداث و يتهم حد تاني بيها.

و في أشكال تانية كثير من الإيذاء ده…..

للأسف النوع ده من الإيذاء ممكن يحصل من الأهل تجاه أولادهم، بين الأزواج، و في الشغل و في المجتمع ناحية الأقلية أو الفئة المستضعفة.

ايه كمان الطرق اللي ممكن يؤذي بها أحد الأطراف في العلاقة بعضهم؟؟

أحد الطرق بيكون عن طريق حيلة دفاعية اسمها الإسقاط أو Projection.

للأسف بعض الشخصيات المضطربة بيكون فيها بعض السمات أو الصفات الغير مقبولة و لأن عقله مش متقبل و لا مستحمل أنه يكون فيه الصفات ده بيبدأ يسقطها على الأخرين، بأنه يلصق عيوبه الغير مرغوب فيها في الطرف الثاني و يلوم و يحاسبه على ده.

مثال عشان نوضح أكثر: واحد كذاب يبدأ يتهم الطرف الثاني ان هو اللي بيكذب عليه.

تصور لما تكون في علاقة مع حد طول الوقت بيسمع عيوبه هو فيك انت و تبدأ انت تصدق ده و تقتنع به، هتكون عامل ازاي؟؟!!!

إيه كمان ممكن يأذي في العلاقة ؟

تصور تلاقي نفسك في علاقة حد عايز يظبطك على مزاجه، يحطك في قالب و يشكلك كأنك تمثال ديكور بيصنعه لبيته.

حد بيلغي قيمك و أهدافك، عايز يغير شكلك و رؤيتك لذاتك، بيوقف أفكارك و يديك أفكاره هو.

  • أم و أب فاكرين أن حقهم يرسموا طريق حياة أولادهم و لو أولادهم رفضوا و معملوش ده يلوموا عليهم و يأنبوهم..
  • زوج عايز زوجته تعيش له بس و تشكل نفسها على أساسه، اوعي تكملي شغلك بعد الجواز، اوعي تلبسي اللبس ده بعد الجواز، اوعي تكوني هتكملي بأفكار ده معايا و هكذا….
  • بنت تقول لصاحبتها لازم تخسي و تغيري شكل شعرك عشان تكوني حلوة و مناسبة للشلة بتاعتنا..

و أمثلة كثير أوي… يا ترى إيه إحساسك و أنت بيوصل إنك غير مرغوب فيك زي ما أنت و إنك لازم تتغير عشان تتحب أو تتقبل؟؟؟!!!

د/ منة لاشين

أخصائي الطب النفسي

ماجستير النفسية والعصبية جامعة عين شمس

معالج جدلي سلوكي

عضو الجمعية العالمية للطب النفسي

اطلب استشارتك الان
اظهار التعليقاتاخفاء التعليقات

اترك تعليقك